ەل ەرتەڭىن بۇگىن ويلاساق ۇتامىز
قازاق ۇلتتىق اگرارلىق ۋنيۆەرسيتەتىنىڭ ستۋدەنت جاستارى مەن وقۋ ورنىنىڭ ستۋدەنتتىك «دوستىق» اسسامبلەياسىنىڭ مۇشەلەرى قازاقستان حالقى اسسامبلەياسىنىڭ پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى ۇسىنىسىن قولداۋ اكتسياسىن وتكىزدى. يگى باستاماعا ءۇن قوسقان جيىرما ءبىر ۇلتتىڭ وكىلىنەن قۇرالعان ۋنيۆەرسيتەت جاستارى باس وقۋ عيماراتىنىڭ الدىنا جينالىپ, ستۋدەنتتىك «دوستىق» بي انسامبلىمەن بىرگە «دوستىق» ءبيىن بيلەپ, ۇلتارالىق تاتۋلىق پەن بىرلىكتىڭ نىشانىن كورسەتتى. ورتاق ىسكە جۇمىلۋعا شاقىرعان شاراعا قاتىسۋشى جاستار قازاقستان حالقى اسسامبلەياسىنىڭ ۇسىنىسىن قولداي وتىرا, كەزەكتەن تىس پرەزيدەنتتىك سايلاۋ وتكىزۋ باستاماسىن حالىق مۇددەسىنە ساي كەلەتىن ەڭ دۇرىس شەشىم دەپ سانايتىندىقتارىن, بۇل – تاۋەلسىز ەلدىڭ بولاشاعى ءۇشىن جاسالاتىن ماڭىزدى قادام ەكەنىن اتاپ ءوتتى. ۋنيۆەرسيتەت رەكتورى, اكادەميك تىلەكتەس ەسپولوۆتىڭ باستاماسىمەن قۇرىلىپ, بىلتىر ءوزىنىڭ 10 جىلدىعىن اتاپ وتكەن «دوستىق» ستۋدەنتتىك اسسامبلەياسى الماتى قالاسىنداعى ورىس, ۋكراين, كۇرد, ۇيعىر, كورەي, چەشەن, تۇرىك, پولياك, بەلورۋس, ت.ب. حالىقتاردىڭ كىشى اسسامبلەيالارىمەن, ەتنومادەني بىرلەستىكتەرىمەن تىعىز بايلانىستا جۇمىس ىستەيدى. ۋنيۆەرسيتەتتە قازاقستاننىڭ جوعارى وقۋ ورىندارىنىڭ اراسىندا ءبىرىنشى بولىپ ەلباسى يدەياسىنان تۋىنداعان «قازاقستان جولى» تاربيە-ءبىلىم ورتالىعى قۇرىلعان. ستۋدەنتتىك «دوستىق» اسسامبلەياسىنىڭ جۇمىسى دا وسى ورتالىق اياسىندا جۇزەگە اسۋعا ءتيىس جاڭا تالاپتارعا نەگىزدەلگەن. باستى ۇستانىم – قازاقستاندىقتاردىڭ مەملەكەتشىل, پاتريوت جاڭا بۋىنىن قالىپتاستىرۋ, جەكە باستىڭ تابىسقا جەتۋ جولدارىن ۇيرەتۋ ادىستەمەسىن دامىتۋ, ەلىمىزدىڭ تۇڭعىش پرەزيدەنتى ن.ءا.نازارباەۆتىڭ ومىرلىك ۇستانىمدارى, جاسامپاز قىزمەتى مەن بولاشاققا قىزمەت ەتەتىن يدەيالارىن پايدالانۋ ارقىلى ستۋدەنتتەردى تىڭ باستامالارعا قاناتتاندىرۋ. بۇگىنگى تاڭدا بەيبىتشىلىك پەن تۇراقتىلىقتى, ىنتىماق پەن بىرلىكتى نىعايتۋدىڭ, وعان قوعام مەن مەملەكەتتىڭ, ەلىمىزدىڭ بارشا ازاماتتارىنىڭ كۇش-جىگەرىن جۇمىلدىرۋدىڭ ماڭىزى زور. وسىعان بايلانىستى, قازاقستان حالقى اسسامبلەياسىنىڭ ۇسىنىسىن قولداي وتىرا, قازاق ۇلتتىق اگرارلىق ۋنيۆەرسيتەتىنىڭ جاستارى مەرزىمىنەن بۇرىن پرەزيدەنتتىك سايلاۋ وتكىزۋ باستاماسىن حالىق مۇددەسىنە ساي كەلەتىن ەڭ دۇرىس شەشىم دەپ سانايدى. بۇل – تاۋەلسىز ەلدىڭ بولاشاعى ءۇشىن جاسالاتىن ماڭىزدى قادام. ۆلاديسلاۆ تسوي, قازۇاۋ ستۋدەنتى, «دوستىق» ستۋدەنتتىك اسسامبلەياسىنىڭ مۇشەسى: – مەن «دوستىق» ستۋدەنتتىك اسسامبلەياسىنىڭ مۇشەسىمىن. ءبىزدىڭ ەل دامۋشى ەلدەردىڭ قاتارىندا. مۇنىڭ ءبارى ەلباسى نۇرسۇلتان نازارباەۆتىڭ ساليقالى ساياساتىنىڭ ناتيجەلەرى. ءبىز پرەزيدەنتىمىزدى قولدايمىز. سايلاۋ وتكىزىلگەن جاعدايدا ەلباسىنا داۋىس بەرەمىز. ەل بولاشاعى – بۇگىنگى جاستاردىڭ قولىندا. سوندىقتان دا ەگەمەن ەلىمىزدەگى تۇراقتىلىق پەن تاتۋلىق ءبىزدىڭ كەلەشەگىمىزدىڭ كەپىلى بولماق. وسىنداي تاريحي شەشۋشى كەزەڭدە بارشا قازاقستاندىقتار ەلباسى ۇستانعان ستراتەگيالىق باعىتتاردى جۇمىلا جۇزەگە اسىرىپ, ەلباسى توڭىرەگىنە توپتاسۋى ءتيىس دەپ سانايمىز. تيمۋر تامەنوۆ, قازۇاۋ ستۋدەنتى, «دوستىق» ستۋدەنتتىك اسسامبلەياسىنىڭ مۇشەسى: – بۇگىندە الەمدە قارجى-ەكونوميكالىق داعدارىستىڭ جاڭا تولقىنى تارالىپ, ءتىپتى, الەمنىڭ ەڭ دامىعان ەلدەرىنىڭ وزىندە دە ءتۇرلى تولقۋلار مەن ءدىني توزىمسىزدىك ءورشىپ, راديكالدىق قوزعالىستار كۇش الۋعا اينالدى. ەلباسى «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا اتاپ ايتقانداي, تاياۋداعى جىلدار جاھاندىق سىناقتاردىڭ ۋاقىتى بولادى. بارلىق ەلدەر وسى كۇردەلى كەزەڭنەن ويداعىداي وتە المايدى. بۇدان تەك مىقتى مەملەكەتتەر, جۇدىرىقتاي جۇمىلعان حالىقتار عانا وتەتىن بولادى. وسى ورايدا, قازاقستان رەسپۋبليكاسى پرەزيدەنتىن سايلاۋدى مەرزىمىنەن بۇرىن وتكىزۋ ارقىلى قازاقستاندىقتاردى ودان ءارى ءبىر ماقسات, ءبىر مۇددەگە توعىستىرىپ, وسىنىڭ ناتيجەسىندە وزەكتى الەۋمەتتىك ماسەلەلەردى ناقتى شەشۋگە مۇمكىندىكتەر تۋاتىنى ءسوزسىز. رۋسلان ۆوروبەۆ, قازۇاۋ ستۋدەنتى, «دوستىق» ستۋدەنتتىك اسسامبلەياسىنىڭ ءمۇشەسى: – مەن قازاق ۇلتتىق اگرارلىق ۋنيۆەرسيتەتىنىڭ ستۋدەنتىمىن ءارى وسى وقۋ ورنىنداعى «دوستىق» اسسامبلەياسىنىڭ مۇشەسىمىن. مەن ءوز دوستارىممەن بىرگە, قازاقستان حالقى اسسامبلەياسىنىڭ مەرزىمىنەن بۇرىن پرەزيدەنتتىك سايلاۋدى وتكىزۋگە بايلانىستى ۇسىنىسىن قولدايمىن. ەل جاستارى قاشاندا ەلباسىمەن بىرگە. پرەزيدەنتتى سايلاۋ – كۇردەلى ساياسي وقيعا. ءبىزدىڭ بولاشاعىمىز كوپ جاعدايدا سوعان بايلانىستى, ياعني ول حالىقتىڭ بولاشاعى. قانات ەسكەندىر, «ەگەمەن قازاقستان». الماتى.دامۋدىڭ سەنىمدى كەپىلى
ءبىز قازاقستاندىقتاردىڭ قازىرگى قىزمەت ەتىپ وتىرعان مەملەكەت باسشىسىنا سەنىم ارتۋىن ەرەكشە تۇسىنىستىكپەن قابىلدايمىز. بۇل قازاقستان حالقىنا «نۇرلى جول – بولاشاققا باستار جول» جولداۋىن, ءاربىر قازاقستاندىقتىڭ جايلى تۇرمىسى جولىنداعى يندۋستريالاندىرۋ باعدارلاماسىن جۇزەگە اسىرۋدىڭ كەپىلى بولىپ تابىلادى. بۇگىنگى تاڭدا «قازاقستان تەمىر جولى» ۇك» اق-تىڭ ەلىمىزدەگى ەكونوميكا كوشباسشىسى قاتارىنان تابىلۋى ەل پرەزيدەنتى نۇرسۇلتان نازارباەۆتىڭ قولداۋى ناتيجەسىندە جۇزەگە اسىرىلدى. قتج ءوزىنىڭ نەگىزگى مىندەتى جۇك جانە جولاۋشىلار تاسىمالىن توقتاۋسىز جۇزەگە اسىرۋمەن قاتار, جاڭا تەمىرجولداردى سالۋ, تەمىرجول ينفراقۇرىلىمىن دامىتۋ, جىلجىمالى قۇرامدى جاڭعىرتۋ ارقىلى ەلىمىزدىڭ ەكسپورتتىق جانە ترانزيتتىك الەۋەتىن ارتتىرۋعا مول ۇلەس قوسىپ كەلەدى. قازاقستاندا ۇلتتىق كومپانيانىڭ ارقاسىندا 2014 جىلى 200 ميلليارد تەڭگەنىڭ ءونىمىن شىعاراتىن ماشينا جاساۋ كلاستەرى جۇزەگە اسىرىلدى. بۇرىن دا, جاڭا تاريحىندا دا تەمىرجول سالاسى مۇنداي كوپسالالى دامۋدى باسىنان وتكىزبەگەن بولاتىن. قازىرگى تاڭداعى الەمدىك داعدارىس پەن تمد اۋماعىنداعى گەوساياساتتاعى قيىندىقتارعا ءبىر عانا جاۋاپ – قازاقستان حالقى اسسامبلەياسى كەڭەسىنىڭ پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى باستاماسىن قولداۋ. بۇل ەلىمىزدىڭ بولاشاقتاعى تۇراقتىلىق پەن جاڭعىرۋىنىڭ, دامۋىنىڭ سەنىمدى رەلسكە ءتۇسۋىنىڭ كەپىلى بولىپ تابىلادى. نىعمەتجان ەسەنعارين, ەكونوميكا عىلىمدارىنىڭ دوكتورى, كەڭەس وداعىنىڭ جول قاتىناستارى ءمينيسترىنىڭ ورىنباسارى, قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى قىزمەتتەرىن اتقارعان.تاۋەلسىزدىكتى تۇعىرلاندىرۋ قادامى
مەن قازاقستان حالقى اسسامبلەياسىنىڭ مۇشەسى رەتىندە, قازاقستان رەسپۋبليكاسىنىڭ پرەزيدەنتىن مەرزىمىنەن بۇرىن سايلاۋ تۋرالى پارلامەنت ماجىلىسىندەگى دەپۋتاتتىق توپتىڭ باستاما كوتەرۋىنە ۇندەۋ جولداعاندار قاتارىندا بولعانىمدى ماقتان ەتەمىن. بۇل الەمدىك ەكونوميكالىق داعدارىس پەن كۇردەلى گەوساياسي جاعداي بارشامىزدى الاڭداتقان تۇستاعى بىردەن-ءبىر دۇرىس شەشىم ەكەندىگى انىق. قازاقستان جانە ونداعى كوپۇلتتى حالىقتىڭ كوشباسشىسى نۇرسۇلتان نازارباەۆتىڭ باتىل باستامالارى, كورەگەن ساياساتى ەلىمىزدى جەدەل دامىتىپ قانا قويماي, جەر-جاھان ۇلگى ەتەتىندەي جاعدايعا كوتەردى. سوندىقتان, بۇگىنگى ۇيعارىمنىڭ توركىنىن داعدارىسپەن عانا بايلانىستىرۋعا نەگىز جوق. نۇرسۇلتان ءابىش ۇلىنىڭ ءوز سوزىمەن ايتقاندا, ەلىمىز بۇدان بۇرىنعى داعدارىستاردى دا تابىستى ەڭسەرە بىلگەن. ماسەلە – تاۋەلسىزدىگىمىزدى تۇعىرلاندىرىپ, «ماڭگىلىك ەلدىڭ» تورىنە وزۋ. مەن پرەزيدەنتتىڭ وتىز جىلدان استام ۋاقىتتان بەرگى سەرىگى, العاشقى جۇرت سەنگەن وكىلىنىڭ ءبىرى رەتىندە نۇرەكەڭنىڭ جان-جۇرەگى ەلىم دەپ سوعاتىنىن جاقسى بىلەمىن. تاۋەلسىزدىك – قازاقستان حالقىنىڭ ورتاق يگىلىگى, قىمبات قۇندىلىعى! وسى تۇرعىدان الىپ قاراعاندا, ۇنەمى شىڭدالۋمەن شىنىققان ورتاق وتانىمىزدى قازىرگى سىن-قاتەرلەردەن ويداعىداي الىپ شىعۋى ءۇشىن, الداعى ۇلكەن جوسپارلارىمىزدىڭ ورىندالۋى ءۇشىن, بولاشاعىمىزدىڭ جارقىن بولۋى ءۇشىن ەلىمىزدىڭ پرەزيدەنتى نۇرسۇلتان نازارباەۆقا جاڭا سەنىم مانداتىن بەرۋىمىز قاجەت. ەلىمىز ءوزىنىڭ باتىل ۇستانىمى مەن ستراتەگيالىق ماقساتتارىنان تايماۋى كەرەك. جاقسىلىقتىڭ, ۇكىلى ءۇمىتتىڭ جەتەگىندەگى حالقىمىز ەلباسىن قولداۋ ارقىلى, ونىڭ جانىنا توپتاسۋ ارقىلى ەرتەڭگى ەڭسەلى كۇندەرگە جەتەتىنىنە, ءۇرىم-بۇتاعىنىڭ باقىتتى بولاتىنىنا كامىل سەنەدى. يبراگيم جانعورازوۆ, «يجەۆسكي» اگروفيرماسىنىڭ ديرەكتورى, سوتسياليستىك ەڭبەك ەرى, «دوستىق» وردەنىنىڭ يەگەرى. اقمولا وبلىسى, ارشالى اۋدانى.ماڭىزدىسى – تۇراقتىلىق پەن وركەندەۋ
قازاقستان حالقى اسسامبلەياسى وتە ورىندى ۇسىنىس جاساپ وتىر. ويتكەنى, تاۋەلسىزدىك العالى بەرى ەلىمىزدەگى تۇراقتىلىق پەن وركەندى وزگەرىستەردىڭ باستاماشىسى بولعان تۇڭعىش پرەزيدەنتىمىز نۇرسۇلتان نازارباەۆتىڭ ەڭبەگى ەرەن ەكەنى بارشاعا ايان. كوپ ەتنوستى قازاقستان جۇرتشىلىعى اركەز ەلىمىزدەگى تاتۋلىق پەن بىرلىكتىڭ بەرىك, وتاندىق ەكونوميكانىڭ كەڭ قانات جايىپ, الەمدەگى بارشا ەلمەن باسەكەلەس بولۋىن قالايدى. ارينە, ايتۋعا وڭاي بولعانمەن, مۇنىڭ بارىنە ءبىر مەزەتتە قول جەتكىزۋ استە قيىن. مىنە, ماسەلەگە وسى تۇرعىدان ۇڭىلگەندە, بىزدەگى ەكونوميكالىق قارقىندى دامۋ مەن ساياسي تۇراقتىلىقتىڭ بۇدان بىلايعى ۋاقىتتا دا ساقتالۋىنىڭ ايرىقشا ماڭىزى بار. ال ەلىمىزدەگى تۇراقتىلىق پەن وركەندەۋدىڭ بىردەن-ءبىر كەپىلى – تۇڭعىش پرەزيدەنتىمىز نۇرسۇلتان نازارباەۆ. ەندەشە, ءبىز پرەزيدەنتتىك سايلاۋدى مەرزىمىنەن بۇرىن وتكىزۋدى قولداۋىمىز قاجەت. بۇل نە ءۇشىن قاجەت؟ بىرىنشىدەن, الەم ەلدەرى قارجى داعدارىسىنىڭ قىسپاعىندا قالىپ جاتقاندا قازاقستانداي ورتاق وتانىمىز تمد مەملەكەتتەرى ءىشىندە ەكونوميكالىق كورسەتكىشتەرىمەن كوشباسشىلىق دەڭگەيگە كوتەرىلدى. حالىقتىڭ ءال-اۋقاتى جاقسارىپ, جاڭا جۇمىس ورىندارى مولىنان اشىلىپ جاتىر. شاعىن جانە ورتا بيزنەس وكىلدەرىنە مەملەكەت تاراپىنان قولداۋ جاسالىپ, سالىق جۇكتەمەلەرى جونىندە جەڭىلدىكتەر جاسالدى. مەكتەپتەر مەن اۋرۋحانالار جاڭاردى. وتاندىق ءونىم ءوندىرەتىن زاۋىتتار مەن فابريكالار قاتارى كوبەيدى. وسىنىڭ ءبارى قازاقستانىمىزدى داعدارىستىڭ تالايىنىڭ قىسپاعىندا قالدىرماي, حالقىمىزدىڭ تۇرمىسى تومەندەمەۋىنە وڭ سەرپىن بەرىپ وتىر. ەكىنشىدەن, سوڭعى كەزدەرى وزگە ەلدەردى ايتپاعاننىڭ وزىندە, تمد مەملەكەتتەرىنىڭ ءبىرازىندا سان الۋان قاقتىعىستار, جانجالدار مەن ارتى دۇردارازدىققا ۇلاسقان شەرۋلەرگە كۋا بولىپ ءجۇرمىز. مۇنداي وقيعالار سول ەلدەردەگى ساياسي تۇراقسىزدىقتىڭ, حالىقتىڭ الەۋمەتتىك تۇرمىسىنىڭ تومەندىگىنىڭ اسەرىنەن بولاتىنى داۋسىز. شۇكىر دەپ ايتايىق, ءبىزدىڭ ەلىمىزدە ساياسي تۇراقتىلىققا, ەتنوستار اراسىنداعى بىرلىك پەن تاتۋلىققا سىنا قاعىلعان جوق. وسىنداي سەبەپتەردى وي ەلەگىنەن وتكىزىپ, الداعى كۇندەرىمىزدىڭ بۇدان دا جارقىن بولۋى جولىندا نۇرسۇلتان نازارباەۆتىڭ ەلىمىزدى باسقارا بەرۋىن قامتاماسىز ەتۋىمىز قاجەت. ول ءۇشىن, ارينە, قازاقستان رەسپۋبليكاسىنىڭ پرەزيدەنتىن سايلاۋدى مەرزىمىنەن بۇرىن وتكىزگەن ءجون. وسى ورايدا, قازاقستان حالقى اسسامبلەياسى كەڭەسىنىڭ ۇسىنىسىنا شىن جۇرەگىممەن قولداۋ بىلدىرەمىن. زۋراب بوبوحيدزە, «يۆەريا» گرۋزين ەتنومادەني بىرلەستىگىنىڭ جەتەكشىسى. اتىراۋ وبلىسى.